ဧရာဝတီ Monday, 01 November 2010
မြန်မာနိုင်ငံတွင် လတ်တလော အင်တာနက် ဆက်သွယ်မှုများ လုံးဝနီးပါး ပြတ်တောက်ရခြင်းမှာ ရွေးကောက်ပွဲကာလ၌ ပြည်ပသို့ သတင်းစီးဆင်းမှု မရှိစေရန် စစ်အစိုးရက ကြိုတင် ထိန်းချုပ် လိုက်ခြင်းသာ ဖြစ်ကြောင်း သတင်းရရှိသည်။
ယင်းကဲ့သို့ထိန်းချုပ်မှုကို ဆက်သွယ်ရေး၊ စာတိုက်နှင့် ကြေးနန်းဝန်ကြီးဌာနက ပြုလုပ်ခြင်းဖြစ်သည်ဟုလည်း ဝန်ကြီးဌာန နှင့် နီးစပ်သူက ပြောသည်။
“၄၅ mbps နှုန်းရှိတဲ့ SEA- ME- We- 3 ရေအောက်ကေဘယ်လ် အပြင် ၁၅ mbps နှုန်းရှိတဲ့ ဂြိုဟ်တုဆက်သွယ်မှုတွေနဲ့ ချိတ်ဆက် ထားတဲ့ စစ်ဘက်၊ အစိုးရဘက်ဆိုင်ရာဌာနတွေမှာတော့ အင်တာနက်လိုင်း က ဘာမှမဖြစ်ဘူး။ အင်တာနက် အသုံးပြုရ တဲ့ လုပ်ငန်းတွေ၊ အင်တာနက် ကဖေးတွေမှာတော့ ဒီတလောအတွင်း ပြည်ပကို သတင်းပေါက်ကြားမှာစိုးလို့ အစိုးရက အင်တာနက်နှုန်းတွေကို လျှော့ချပစ်တာ”ဟု အဆိုပါ ဝန်ကြီးဌာနနှင့် နီးစပ်သူက ဧရာဝတီသို့ ပြောသည်။
စာနယ်ဇင်းသမားများ နှင့် နိုင်ငံတကာစောင့်ကြည့်လေ့လာသူများကလည်း ပြီးခဲ့သည့် နှစ်ပေါင်းနှစ်ဆယ်တွင် ပထမဆုံး ကျင်းပမည့် ရွေးကောက်ပွဲကာလတွင် အင်တာနက်၊ တယ်လီဖုန်း ဆက်သွယ်မှုများ ပြတ်တောက်မည်ကို စိုးရိမ်နေကြ သည်။
စစ်အစိုးရသည် ရွေးကောက် ပွဲကာလတွင် အင်တာနက်ချိတ်ဆက်မှုကို ထိန်းချုပ်မည်၊ ယခုအကြိမ် အင်တာနက်လိုင်းများ နှေးကွေးခြင်း၊ ပြတ်တောက်ခြင်းတို့မှာလည်း စစ်အစိုးရက ထိန်းချုပ်ထားခြင်းဖြစ်သည်ဟု နယ်စည်းမခြား သတင်းထောက် များ အဖွဲ့ (RSF) နှင့် မြန်မာ့သတင်းသမဂ္ဂ (BMA) တို့က ပူးပေါင်းထုတ်ပြန်သည့် ကြေညာချက်တွင် ပါရှိသည်။
ယင်းကိစ္စကို စစ်အစိုးရထိန်းချုပ်ထားသည့် ရတနာပုံတယ်လီပို့က ပြည်တွင်း အင်တာနက်လိုင်းများကို ပြည်ပမှ DDoS စနစ်ဖြင့် တိုက်ခိုက်သဖြင့် အင်တာနက်လိုင်းများ ပြတ်တောက်ရခြင်းဖြစ်သည်ဟု ရတနာပုံ ဝက်ဘ်ဆိုဒ် တွင် ဖော်ပြထားသည်။
ကွန်ပျူတာပညာရှင်များက DDoS စနစ်ဖြင့် တိုက်ခိုက်ခြင်းသည် ဝက်ဘ်ဆိုဒ်များကိုသာ တိုက်ခိုက်နိုင်ပြီး အင်တာနက် ဆာဗာကို တိုက်ခိုက်၍ မရကြောင်း ပြောဆိုသည်။
မြန်မာနိုင်ငံတွင်း အင်တာနက် ဆက်သွယ်မှုများကို ဆက်သွယ်ရေးစာတိုက်နှင့် ကြေးနန်းဝန်ကြီးဌာန နှင့် ရတနာပုံ တယ်လီပို့ တို့မှ ဝန်ဆောင်မှု ပေးနေပြီး စစ်ဘက်နှင့် အစိုးရဘက်ဆိုင်ရာဌာနများအတွက်ကို ဝန်ကြီးဌာနမှ လည်းကောင်း သာမန် အရပ်သားများအသုံးပြုရန်အတွက် ရတနာပုံ တယ်လီပို့ မှ လည်းကောင်း တာဝန်ယူရသည်။
လာမည့် ရွေးကောက်ပွဲကာလတွင် ပြည်တွင်းအခြေစိုက် သတင်းထောက်များအနေဖြင့် ပြည်ပသို့ သတင်း အချက်အလက် များ၊ ဓာတ်ပုံများကို အင်တာနက်မှတဆင့် ပို့ရန် ခက်ခဲလိမ့်မည်ဖြစ်ကြောင်း လေ့လာသုံးသပ်သူများက ပြောဆိုသည်။
၂၀၀၇ ခုနှစ် ရွှေဝါရောင် တော်လှန်ရေးကာလအတွင်း စစ်အစိုးရက အင်တာနက်လိုင်းများ ထိန်းချုပ်ခြင်း၊ အင်တာနက် ကဖေးများကို ပိတ်ခိုင်းခြင်း တို့ပြုလုပ်ခဲ့ဖူးသည်။
ယနေ့ထုတ် အေပီ သတင်းတွင် အင်တာနက်ကို အဓိကအသုံးပြုရသည့် ဟိုတယ်များ၊ ခရီးသွားအေဂျင်စီများက ပြီးခဲ့သည့် ရက်သတ္တပတ်အတွင်းမှစပြီး အင်တာနက်လိုင်းများ နှေးကွေးခြင်း၊ ပြတ်တောက်ခြင်းများကို ပြောဆိုခဲ့သည်ဟု ဖော်ပြထား သည်။
၎င်းတို့ကလည်း အင်တာနက်လိုင်းများပြတ်တောက်ခြင်းသည် ရက်သတ္တပတ်ခန့် ကြာမြင့်ဦးမည်ဖြစ်ကြောင်း ခရီးသွားများ ကို ပြောဆိုသည်ဟုလည်း ဖော်ပြထားသည်။
တချို့နေရာများကလည်း ယနေ့မှစ၍ တယ်လီဖုန်းလိုင်းများပါ ခက်ခဲလာသည်ဟု ပြောဆိုကြသည်။
ပြည်ထောင်စု ရွေးကောက်ပွဲ ကော်မရှင်ကလည်း ရွေးကောက်ပွဲကျင်းပမည့် နေ့တွင် မဲရုံပရဝုဏ် အတွင်း သတင်းယူခြင်း၊ ဓာတ်ပုံရိုက်ခြင်းများကို တားမြစ်သည်ဟု ကြေညာချက်ထုတ်ပြန်ထားသည်။
RSF မှ ထုတ်ပြန်သည့် အစီရင်ခံစာများအရ ဥရောပတိုက်မှ သတင်းထောက်တချို့သည် မြန်မာနိုင်ငံသို့ သွားရန် ခရီးသွား ဗီဇာ လျှောက်ထားရာတွင် ငြင်းပယ်ခံရကြောင်း၊ စစ်အစိုးရက ဂူဂဲလ် အသုံးပြုကာ လျှောက်ထားသူများ၏ အလုပ်အကိုင်၊ အထောက် အထားကို ရှာဖွေခဲ့ရာ သတင်းထောက်အဖြစ် တွေ့ရှိခဲ့သဖြင့် ဗီဇာထုတ်မပေးခြင်းဖြစ်သည်ဟု ပြင်သစ် သတင်းထောက်တဦးက ပြောဆိုသည်။
RSF အစီရင်ခံစာတွင် သတင်းထောက်များအနေဖြင့် မြန်မာနိုင်ငံသို့ သွားရာတွင် ဂျာနယ်လစ် ဗီဇာဖြင့်သွားရန် မလွယ်ကူ ကြောင်း ခရီးသွား ဗီဇာဖြင့်သာ သွားရောက်နိုင်ကြောင်း ဖော်ပြထားသည်။
၂၀၁၀ ခုနှစ်အတွင်း RSF မှ ထုတ်ပြန်ခဲ့သည့် အင်တာနက်၏ ရန်သူများ Enemies of the Internet အမည်ရသည့် အစီရင်ခံစာ၌ မြန်မာနိုင်ငံသည် အဆိုးဆုံး ၁၀ နိုင်ငံတွင် ပါဝင်သည်ဟု ဖော်ပြထားသည်။
No comments:
Post a Comment