အမိကရင်ပြည်

RFA Burmese

ကာကွယ်ရေးဦးစီးချုပ်က သူတို့ မြန်မာ့တပ်မတော်ရဲ့ မူလတောင်းဆိုချက်ဖြစ် တဲ့ နိုင်ငံရေးဆွေးနွေးပွဲတွေ မစတင်မီ တိုင်းရင်းသား လက်နက်ကိုင်အဖွဲ့တွေ လက်နက်ဖျက်သိမ်းရမယ် ဆိုတဲ့အချက်ကို အလျှော့ပေးလိုက်ပြီလို့ သိရပါတယ်။ အဲဒီတောင်းဆိုချက်ကို တိုင်းရင်းသား တော်လှန်ရေးအဖွဲ့တွေက သဘောမတူ ကြတဲ့အတွက် မြန်မာ့တပ်မတော်ဘက်က အခု လိုက်လျောလက်ခံလိုက်တယ်လို့ လိုင်ဇာအစည်းအဝေးတက်ရောက်တဲ့ NCCT အဖွဲ့ဝင် ဗိုလ်မှူးကြီးခွန်ဥက္ကာ က RFA ကို စနေနေ့မှာ ပြောကြားလိုက်ပါတယ်။
အခုနောက်ဆုံးသဘောတူညီချက်အရ တနိုင်ငံလုံး အပစ်အခတ်ရပ်စဲ ပြီးနောက် နိုင်ငံရေးဆွေးနွေးပွဲတွေစတင်မှာဖြစ်ပြီး အဆိုပါနိုင်ငံရေးဆွေးနွေးပွဲတွေကနေ “ပြည်ထောင်စုသဘောတူညီချက်” ဆိုပြီးစာချုပ်တစ်ခု ပေါ်ထွက်လာမှာဖြစ်ပါတယ်။ အဲ့ဒီ “ပြည်ထောင်စုသဘောတူညီချက်” ထဲမှာပါဝင်မယ့် “လုံခြုံရေးဆိုင်ရာ ပြန်လည်ပေါင်း စည်းရေး” ဆိုတဲ့ ခေါင်းစဉ်အောက်မှာမှ လက်နက်ဖျက်သိမ်းရေးအစီအစဉ်ကို ထည့်သွင်းပြဌာန်းမယ်လို့ ဆိုပါတယ်။

အခုလို သဘောတူညီမှုကြောင့် တိုင်းရင်းသားအဖွဲ့တွေအနေနဲ့ နိုင်ငံရေးဆွေးနွေးပွဲတွေ ပြီးဆုံးတဲ့အထိ သူတို့ကိုင်ဆောင်နေတဲ့ လက်နက်တွေကို စွန့်လွှတ်ဖို့ မလိုတော့တဲ့အတွက် အစိုးရနဲ့ တိုင်းရင်းသားတော်လှန်ရေးအဖွဲ့တွေအကြား ဆွေးနွေးပွဲတွေရဲ့တိုးတက်မှု တစ်ခုအဖြစ် ရှုမြင်ကြပါတယ်။

ဒါ့အပြင် “နှစ်ဖက်တပ်ဖွဲ့များလိုက်နာရမယ့် စည်းကမ်းချက်တွေ” (Ceasefire Code of Conduct) ကို တနိုင်ငံလုံးအပစ်အခတ်ရပ်စဲရေးစာချုပ် လက်မှတ်ထိုးအပြီး တလခန့်အကြာမှာမှ သီခြားသဘောတူညီချက်အဖြစ် နောက်ဆက်တွဲလက်မှတ်ထိုးမယ်လို့ တပ်မတော်ဘက်ကပြောကြားခဲ့ပေမယ့် အခုတော့ တနိုင်ငံလုံးအပစ်အခတ်ရပ်စဲရေးစာချုပ်မှာ အဲဒီ (Ceasefire Code of Conduct) စည်းကမ်းချက်တွေကို တပါတည်းထည့်သွင်းဖို့ တိုင်းရင်းသားတွေဘက်က တင်ပြတာကို တပ်မတော်ကာကွယ်ရေးဦးစီးချုပ်က သဘောတူလိုက်ပြီလို့ သိရပါတယ်။ အခုလို တပ်မတော်ဘက်က တောင်းဆိုချက်တွေ ကို လျှော့ပေါ့ပေးခဲ့တဲ့ ကိစ္စမှာ နိုင်ငံတော်သမ္မတရဲ့ လမ်းညွန်ချက်ပါဝင်တယ်လို့ကြား သိရကြောင်းလည်း ဗိုလ်မှူးကြီး ခွန်ဥက္ကာ က RFA ကို ပြောပါတယ်။