နိုဝင်ဘာလ ၂၂ရက်။ စောဖိုးမူး (ကေအိုင်စီ)
ကရင်ပြည်နယ်၊ လှိုင်းဘွဲမြို့နယ်အတွင်းရှိ စေဖိုးခီးကျေးရွာတွင် ကလေးများ၏ အတွေ့အကြုံနှင့် လူမှုဆက်ဆံရေး ပိုမို အား ကောင်းလာစေရန် ရည်ရွယ်၍ ကိုယ်ထူကိုယ်ထ မူလတန်းကျောင်း ၁၃ကျောင်း ပူးပေါင်းကာ ကျောင်းသားပွဲတော်ကို ယနေ့ နိုဝင်ဘာလ ၂၂ရက်နေ့မှ ၂၄ရက်နေ့အထိ ကျင်းပပြုလုပ်သွားမည် ဖြစ်သည်။
စေဖိုးခီးရွာ အပါအ၀င် ကလေ့မို့ခီး၊ ကလေ့ဖိုးကလိုး၊ မဲ့ကဲခီး၊ ဝေါ့ကျော့၊ ဘွေ့ပရော်လေး၊ မဲ့လာအားထာ့၊ မဲ့လာအားခီး၊ ထီးက ဟော၊ ၀ါ့မီကလား၊ ကျော်ကေ့ထာ့၊ သေ့မော်ကုနှင့် ကားထာ့ရွာများမှ မူလတန်းကျောင်းများက အဆိုပါစုပေါင်း ကျောင်းသားပွဲ တော်ကို ပူးပေါင်းပါဝင် ဆင်နွှဲကြခြင်းဖြစ်သည်။
ပွဲတော်ဖြစ်မြောက်ရေး ဦးဆောင်စီစဉ်သူ ဆရာစောရိန်းဘိုးက ကျောင်းသားပွဲတော်မှာ ကလေးများအတွက် ရည်ရွယ်ချက် အကြောင်းအရာ ၃ခုအပေါ် အဓိကထား ပြုလုပ်ပေးခြင်းဖြစ်ကြောင်း ကေအိုင်စီသို့ ယခုလို ပြောဆိုသည်။
“ကလေးတွေကို အကြောင်းအရာ ၃ခု ကျနော်တို့ စီစဉ်ထားတယ်။ တစ်အချက်က ကလေးတွေ ကိုယ့်ကိုယ်ကို ယုံကြည်မှုရှိဖို့ လက်တမ်းသီချင်းဆိုပြိုင်ပွဲ၊ နှစ်အချက်က ရိုးရာအစဉ်အလာ ထိန်းသိမ်းဖို့အတွက် ရိုးရာပုံပြင်ပြောတာ၊ အတီးအက၊ ရက်ကန်း ယက်၊ ကြက်ခြင်းယက်ပြိုင်ပွဲနဲ့ သုံးအချက်ကတော့ လူမှုဆက်ဆံရေးအတွက် ရည်ရွယ်ပြီး ဘောလုံးနဲ့ အပြေးပြိုင်ပွဲ စတာတွေ လုပ်ပေးမှာ ဖြစ်တယ်။”ဟု ပြောသည်။
အဆိုပါကျောင်းသားပွဲတော် ကျင်းပနိုင်ရေးအတွက် လိုအပ်သည့် ကုန်ကျစရိတ်များကို စေတနာရှိသူ ဒေသခံ ရွာသူရွာသား များထံမှ အလှူကောက်ခံခဲ့ခြင်းဖြစ်ပြီး ပွဲတော်၌ ကျောင်း ၁၃ကျောင်းမှ ကျောင်းဆရာ ဆရာမများ၊ ကျောင်းသားကျောင်းသူ အပါအ၀င် စေဖိုးခီး အနီးတ၀ိုက်ရှိ ဒေသခံများ စုစုပေါင်း ၂၀၀ကျော် ယနေ့ လာရောက်ခဲ့ကြသည်ဟုလည်း သူက ဆက်ပြော သည်။
ကျောင်းသားပွဲတော်၌ ပါဝင်သူ စတုတ္ထတန်းကျောင်းသား စောဘလယ့်ဖိုးက “တခြားကျောင်းက ကျောင်းသူကျောင်းသားတွေ နဲ့ ဆုံဆည်းခွင့်ရပြီး သူငယ်ချင်းဖြစ်ခွင့်တဲ့အတွက် အရမ်းပဲ ၀မ်းသာတယ်။ အခုလို ပွဲတော်မျိုးကို ကျင်းပပေးတဲ့ ဆရာ၊ ဆရာမ တွေကိုလည်း အထူးပဲ ကျေးဇူးတင်တယ်”ဟု ပြောသည်။
အစီအစဉ်အရ မနက်ပိုင်း ၆နာရီမှ ည ၉နာရီအထိ အားကစား၊ အဆိုအတီး၊ ပုံပြော စသည့် ပွဲယှဉ်ပြိုင်မှုများဖြင့် လုပ်ဆောင် သွားမည်ဖြစ်ပြီး နောက်ဆုံးနေ့တွင် ဆုများကို ပေးအပ်ချီးမြှင့်သွားမည်ဖြစ်သည်။
စေဖိုးခီးစာသင်ကျောင်းသည် ပြီးခဲ့သည့် ၂၀၀၁ခုနှစ် မေလတွင် ကိုယ်ထူကိုယ်ထ စာသင်ကျောင်းအဖြစ် စတင် တည်ထောင်ခဲ့ ပြီး ထိုနှစ် နိုဝင်ဘာလမှစ၍ ယခုနှစ်အထိ ကျောင်းသားပွဲတော်ကို ကျင်းပလာခဲ့ရာ ၁၀ကြိမ်မြောက်ရှိပြီဖြစ်သည်ဟု သိရသည်။
စေဖိုးခီး ကိုယ်ထူကိုယ်ထကျောင်းမှ ကျောင်းသူကျောင်းသားများသည် ၂၀၀၉ခုနှစ်၊ ဇွန်လအတွင်းက တိုးတက်သောဗုဒ္ဓဘာ သာ ကရင်အမျိုးသားတပ်မတော်-DKBA နှင့် စစ်အစိုးရတပ်တို့ ပူးပေါင်းကာ ကရင်အမျိုးသားလွတ်မြောက်ရေးတပ်မတော်-KNLA တပ်မဟာ(၇)ကို ထိုးစစ်ဆင်ခဲ့စဉ်က ထိုင်းနိုင်ငံသို့ စစ်ပြေးဒုက္ခသည်အဖြစ် တနှစ်ဝန်းကျင် ထွက်ပြေးခိုလှုံခဲ့ရသည်။
ရန်ကုန်တိုင်းတွင် ဓာတ်ငွေ့ဂက်စ်ဈေးနှုန်း ၂ဆနီးပါး ထပ်တက်လာ
နိုဝင်ဘာလ ၂၂ရက်။ နော်ဆဲကလယ် (ကေအိုင်စီ)
ရန်ကုန်တိုင်းအတွင်း အငှားကားများနှင့် မီးဖိုချောင်တွင် အသုံးပြုနေသည့် ဓာတ်ငွေ့(Gas) ဈေးမှာ နိုဝင်ဘာလလယ်မှစ၍ နှစ်ဆနီးပါးခန့် မြင့်တက်သွားသဖြင့် ဓာတ်ငွေ့ရောင်းဝယ်သူများနှင့် အငှားကားမောင်းသူများ အခက်တွေ့လျက်ရှိသည်ဟု သိရသည်။
ဒဂုံမြို့သစ် ဓာတ်ငွေ့အရောင်းဆိုင်မှ ဆိုင်ရှင်တစ်ဦးက “ဈေးတက်တာက ၁၆ရက်နေ့ကပါ။ ဂက်စ်ဈေးက အရင်ကဆို ၅,၇၆၄ ကျပ်လေ။ အခုတော့ ၁၅,၀၀၀ကို တက်သွားတာ။ ”ဟု ကေအိုင်စီသို့ ပြောသည်။
ယင်းသို့ ဓာတ်ငွေ့ဂက်စ်ဈေးနှုန်း မြင့်တက်သည်ကို သတင်းစာ၊ ရုပ်မြင်သံကြားများတွင် အများသိစေရန် ကြိုတင် အသိပေး ထားခြင်း မရှိဘဲ ဈေးမတက်ခင် သုံးရက်အလိုတွင်သာ ဓာတ်ငွေ့အရောင်းဆိုင်ကြီးများရှေ့၌ ဆိုင်းပုဒ်ကပ်ထားခြင်းဖြစ်၍ ဈေး တက်သည့်နေ့မှသာ လာရောက်ဝယ်ယူကြသူများအဖို့ အခက်အခဲဖြစ်ကြရသည်ဟုလည်း ၎င်းက ဆက်လက် ပြောဆိုသည်။
“ဈေးမတက်ခင် သုံးရက်အလိုကတော့ ဆိုင်ရှေ့မှာ ဆိုင်းပုဒ်ကပ်ထားတာတယ်။ တချို့က ဈေးတက်တာမသိလို့ ထုတ်တဲ့နေ့ မှာ လာဝယ်တော့မှ ငွေကို ဟိုချေးဒီချေးနဲ့ ဒုက္ခရောက်ကြတယ်။ ဘာစာမှလည်း မထုတ်ဘူး။ ဈေးတက်တာမေးလည်း မသိဘူး ဘဲ ပြောတယ်။”ဟု ဆိုသည်။
အစိုးရပိုင် ဓာတ်ငွေ့အရောင်းဆိုင်များတွင် ဈေးနှုန်းနှစ်ဆ မြင့်တက်သွားသော်လည်း ပုဂ္ဂလိက ဓာတ်ငွေ့ဆိုင်များတွင်မူ ယနေ့ အထိ ယခင် ဈေးနှုန်းများအတိုင်းသာ ရောင်းချပေးနေဆဲဖြစ်သည်ဟု သိရသည်။ ပုဂ္ဂလိကဆိုင်များတွင် ဓာတ်ငွေ့တစ်အိုးလျှင် ၂,၂၅၀ကျပ်နှုန်းဖြင့် ပေးဝယ်နေရပြီး အပြင်ဈေးနှုန်းမှာ ၂,၄၀၀ကျပ် ဖြစ်သည်။
ရန်ကုန်မြို့ခံ အများစုက ၀ယ်ယူအသုံးပြုနေကြသည့် ဓာတ်ငွေ့များမှ စင်္ကာပူနိုင်ငံမှ တင်သွင်းလာခြင်းဖြစ်ပြီး ထိုင်းနိုင်ငံမှ တင် သွင်းလာသော ဓာတ်ငွေ့ဗူးများမှာမူ ဈေးနှုန်းမြင့်တက်ခြင်း မရှိပေ။
ယခုလို ဓာတ်ငွေ့ဈေးနှုန်း နှစ်ဆတက်လာသည့်အပေါ် အလုံမြို့နယ်ရှိ အစိုးရပိုင်ဓာတ်ငွေ့အရောင်းဆိုင်သို့ ကေအိုင်စီက ဆက်သွယ်မေးမြန်းရာ ဆိုင်မန်နေဂျာက နေပြည်တော်မှ ဈေးတက်ခိုင်းသဖြင့် တက်ရခြင်းဖြစ်ကြောင်း ပြန်လည် ဖြေကြားခဲ့ သည်။
ဓာတ်ငွေ့ဂက်စ် အသုံးပြုသည့် ရန်ကုန်မြို့ခံတစ်ဦးက “အခုထိတော့ အပြင်ဆိုင်တွေမှာ ဈေးက အရင်အတိုင်းပဲ ၀ယ်သုံးနေရ သေးတယ်။ နောက်ပိုင်းတော့ မသိဘူး။ ဓာတ်ငွေ့ထုတ်ဈေး တက်တယ်ကြားကတည်းက ဘယ်တော့ ရောင်းဈေးတက်မလဲ စိုးရိမ်နေရတာလေ။ ကားခတွေကလည်း လောလောဆယ် ပုံမှန်ပါပဲ”ဟု ပြောသည်။
ရန်ကုန်မြို့ပေါ်တွင် ၂၀၀၀ခုနှစ်မတိုင်ခင်ကတည်းက ဓာတ်ငွေ့များကို အနည်းငယ် အသုံးပြုခဲ့ကြသော်လည်း ကားများတွင် ဓာတ်ငွေ့များ ထည့်သွင်းမောင်းနှင်မှု များလာသည့် ၂၀၀၄ခုနှစ်မှစ၍ အိမ်တိုင်းလိုလိုပင် ဓာတ်ငွေ့သုံးစွဲမှု များလာခြင်းဖြစ် သည်။
စွမ်းအင်ဝန်ကြီးဌာနက တိုက်ရိုက် ထုတ်ယူရောင်းချခွင့်ပေးထားသည့် အစိုးရပိုင် ဓာတ်ငွေ့(ဂက်စ်)အရောင်းဆိုင်များမှာ ရန်ကုန်တိုင်းအတွင်း အလုံ၊ ဒဂုံ၊ အင်းစိန်နှင့် သံလျင်မြို့နယ်များ၌ ရှိသည်။
သို့သော် ပြည်နယ်ဒေသရှိ မြို့နယ်များ၌မူ နီးစပ်ရာ အိမ်နီးချင်း ထိုင်းနိုင်ငံများမှ ဓာတ်ငွေ့ဂက်စ်အိုးများကိုသာ ၀ယ်ယူအသုံးပြု နေကြခြင်း ဖြစ်သည်။
No comments:
Post a Comment