Monday, 19 October 2009 18:46 ဘစောတင်
ထိုင်း - မြန်မာ နယ်စပ်၊ မြ၀တီမြို့ရှိ ဟေမာန်ဦးနှင့် မိကျောင်းကုန်း ဘုန်းတော်ကြီး ကျောင်းတို့တွင် ယခုလဆန်းပိုင်းမှ စတင်ကာ ဘုန်းကြီးကျောင်း ရန်ပုံငွေဟု ခေါင်းစဉ်တပ်၍ လောင်းကစား ၀ိုင်းများ ပြုလုပ် ငွေရှာလျှက်ရှိကြောင်း သိရှိရသည်။
မြ၀တီမြို့ခံတဦးက “ကျနော်တို့မြို့မှာ လောင်းကစား လုပ်တာက သိပ်တော့ မဆန်းတော့ဘူးဗျာ၊ ဒါပေမယ့် ဘုန်းကြီးကျောင်းမှာ ကျောင်းရန်ပုံငွေအတွက်ဆိုပြီး လုပ်တာကတော့ အရမ်းကို အရုပ်ဆိုးတယ်” ဟု ဧရာဝတီသို့ ပြောသည်။
အဆိုပါ ဘုန်းတော်ကြီးကျောင်းများတွင် အနီထောင်ဝိုင်း (လေးကောင်ဂျင်)၊ ဖဲဝိုင်း၊ အံစာဝိုင်းနှင့် ဘောလုံး လောင်းကစားဝိုင်းများ ပြုလုပ်ကြောင်း၊ ထိုသို့ လောင်းကစားဝိုင်းများ ပြုလုပ်သဖြင့် မူးယစ်သောက်စား ခြင်းများလည်း ပါလာကြောင်း၊ လောင်းကစားဝိုင်းများမှ ရရှိသော အကောက်ငွေများကို ဘုန်းတော်ကြီးများ ကိုယ်တိုင် လက်ခံ ရယူကြောင်းနှင့် ဘုန်းကြီးကျောင်း ဆောက်လုပ်ရန်အတွက်ဟု အကြောင်းပြကာ ယခုကဲ့သို့ ငွေရှာနေခြင်း ဖြစ်ကြောင်း ၎င်းမြို့ခံက ဆက်လက် ပြောဆိုသည်။
မြဝတီမြို့တွင် နေရာတိုင်း၌ တိုးတက်သော ဗုဒ္ဓဘာသာ ကရင်အမျိုးသားတပ်ဖွဲ့ (DKBA) က ဦးစီးသည့် လောင်းကစားဝိုင်းများ ရှိနေကြောင်းလည်း မဲဆောက်မြို့နှင့် မြ၀တီမြို့ကို ကူးသန်းကာ အရောင်းအ၀ယ်
လုပ်နေသူ ကိုစောသန်းမြင့်က ပြောသည်။
“DKBA တွေလုပ်တဲ့ လောင်းကစားပွဲကို အာဝါဒေးလို့ခေါ်တယ်၊ ဘုန်းကြီးတွေ လုပ်တာကိုတော့ ရန်ပုံငွေ ပွဲလို့ခေါ်တယ်။ မြ၀တီမှာက ကထိန်ခင်း ရှင်ပြုတာတောင် လောင်းကစားပွဲပါမှ စည်တာ” ဟု ၎င်း၏ အတွေ့အကြုံကို ရှင်းပြသည်။
DKBA မှ ရဲဘော်တဦးကလည်း လောင်းကစားဝိုင်းပြုလုပ်သည့် ဘုန်းတော်ကြီးကျောင်းမှ ဘုန်းတော်ကြီးများ ၀င်ငွေကောင်းနေကြောင်း၊ ဒိုင်လုပ်သူက အမြတ်ငွေ၏ ၁၀ ရာခိုင်နှုန်း ကောက်ခံရရှိကြောင်း ပြောပြသည်။
“ကျနော်တောင် ဘုန်းကြီးဝတ်ချင်လာပြီ၊ တနေ့ကို အကောက်က ကျပ် သိန်း ၃၀၊ ၄၀ လောက် ရတယ်၊ အဲဒါအနည်းဆုံးပဲ။ ကစားကြေးတွေကလည်း သိန်းရာဂဏန်းကနေ ထောင်ချီနေတာ” ဟု ၎င်းက ဆိုသည်။
ယင်းလောင်းကစားဝိုင်းများသို့ ကုန်သည်ပွဲစားများ၊ DKBA တပ်ဖွဲ့ဝင်များ၊ အာဏာပိုင်များမှ အစ လူငယ်လူရွယ် ကျောင်းသားငယ်များအထိ ဝင်ရောက် ကစားလေ့ရှိကြောင်း သိရသည်။ ထိုသို့ လောင်းကစားကြစဉ် လိမ်လည်မှု၊ ပစ္စည်းအလွဲသုံးစားပြုမှုများလည်း မကြာခဏ ဖြစ်ပေါ်လေ့ရှိကြောင်း မြဝတီမြို့ခံ ကုန်သည်တဦးက ဆိုသည်။
“လူတွေက ပင်ပေါင်ဘောလုံးလေးတွေကို အရောင်နဲ့တမျိုး ဂဏန်းတွေနဲ့ တမျိုး ကစား ကြတာကို ပိုစွဲကြ တယ်။ လောင်းကစားပွဲမှာ ရှုံးတဲ့သူက ပါလာတဲ့ ကားတို့၊ ဆိုင်ကယ်တို့ စက်ဘီးတို့ကို ပေါင်ကြတာပေါ့၊ အဲဒီလို ပေါင်တဲ့ထဲမှာ ကိုယ်ပိုင်ပါသလို တချို့လည်း ခဏငှားလာတာတွေ ပါတယ်။ အဲဒီပြဿနာ နေ့တိုင်း ရှိတယ်” ဟု သူက ဆက်ပြောသည်။
မြ၀တီနှင့် မဲဆောက်နယ်စပ်တွင် ဆိုင်ကယ်များ စက်ဘီးများ မကြာခဏ ပျောက်ရှလျှက် ရှိသည်ဟုလည်း သူက ဆိုသည်။
No comments:
Post a Comment